'ಲೆಟ್ಸ್ ಬ್ರೇಕ್ಅಪ್'ನಲ್ಲಿ ವಿಹಾನ್, ಶ್ರೀಲೀಲಾ

ಲೆಟ್ಸ್ ಬ್ರೇಕ್ಅಪ್ ಫಾರೆವರ್ ನಲ್ಲಿ ನಟ ವಿಹಾನ್ ಹಾಗೂ ನಟಿ ಶ್ರೀಲೀಲಾ ಅವರು ಜೋಡಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. 

ಕಿಸ್ ಚಿತ್ರದ ಮೂಲಕ ಸ್ಯಾಂಡಲ್ವುಡ್'ಗೆ ಪರಿಚಯವಾಗಿರುವ ಶ್ರೀಲೀಲಾ ಅವರು, ಬಳಿಕ ಭರಾಟೆ ಚಿತ್ರದ ಮೂಲಕ ಸಿನಿಪ್ರಿಯರಿಗೆ ಹತ್ತಿರವಾಗಿದ್ದಾರೆ. ಪ್ರಸಕ್ತ ಸಾಲಿನಲ್ಲಿ ಎರಡು ದೊಡ್ಡ ಚಿತ್ರಗಳಲ್ಲಿ ಅಭಿನಯಿಸಿರುವ ಶ್ರೀಲೀಲಾ ಅವರು ಇದೀಗ ಪಂಚತಂತ್ರ ಖ್ಯಾತಿಯ ವಿಹಾನ್ ಅವರಿಗೆ ಲೆಟ್ಸ್ ಬ್ರೇಕಪ್ ಚಿತ್ರದಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. 

ಜಯಣ್ಣ ಕಂಬೈನ್ಸ್ ಮೂಲಕ ಅದ್ದೂರಿಯಾಗಿ ನಿರ್ಮಾಣವಾಗುತ್ತಿರುವ ಈ ಚಿತ್ರಕ್ಕೆ ಹೊಸ ನಿರ್ದೇಶಕ ಸ್ವರೂಪ್ ಅವರು ಆ್ಯಕ್ಷನ್ ಕಟ್ ಹೇಳಲಿದ್ದಾರೆ. ರೊಮ್ಯಾಂಟಿಕ್ ಲವ್ ಸ್ಟೋರಿ ಇರುವ ಈ ಚಿತ್ರದಲ್ಲಿ ವಿಹಾನ್ ಹಾಗೂ ಶ್ರೀಲೀಲಾ ಅವರು ಆಕರ್ಷಕವಾಗಿ ಕಾಣಿಸಿಕೊಳ್ಳಲಿದ್ದಾರಂತೆ. 

ಮೇ ತಿಂಗಳಿನಲ್ಲಿ ಚಿತ್ರ ಸೆಟ್ ಏರಲಿದ್ದು, ಚಿತ್ರದ ಮೊದಲನೇ ಪೋಸ್ಟರ್ ನ್ನು ಚಿತ್ರ ತಂಡ ಪ್ರೇಮಿಗಳ ದಿನದಂದು ಬಿಡುಗಡೆ ಮಾಡಲಿದೆ. ಇನ್ನು ಚಿತ್ರ ತಂಡ ಈಗಾಗಲೇ ಸಂಗೀತ ಸಂಯೋಜನೆ ಕಾರ್ಯ ಆರಂಭಿಸಿದ್ದು, ಚಿತ್ರದಲ್ಲಿ ಒಟ್ಟು ಐದು ಹಾಡುಗಳಿರಲಿವೆ. ಚಿತ್ರದ ಬಹುತೇಕ ಚಿತ್ರೀಕರಣ ಬೆಂಗಳೂರಿನಲ್ಲಿಯೇ ನಡೆಯಲಿದೆ. ಮಂಗಳೂರಿನ ಕರಾವಳಿ ತೀರ ಪ್ರದೇಶದಲ್ಲಿಯೂ ಚಿತ್ರೀಕರಣ ನಡೆಯಲಿದೆ. ಚಿತ್ರ 2020ರ ಅಕ್ಟೋಬರ್ ಅಥವಾ ಡಿಸೆಂಬರ್ ತಿಂಗಳಿನಲ್ಲಿ ಬಿಡುಗಡೆಗೊಳ್ಳಲಿದೆ ಎಂದು ಚಿತ್ರದ ತಂಡ ಮಾಹಿತಿ ನೀಡಿದೆ.