ಪೊಗರು ಚಿತ್ರಕ್ಕಾಗಿ ಮಲ್ಲಕಂಬ ತರಬೇತಿಗೆ ಧ್ರುವ ಸರ್ಜಾ ಸಜ್ಜು

ಧ್ರುವ ಸರ್ಜಾ ನಟನೆಯ ಪೊಗರು ಚಿತ್ರ ಬಿಡುಗಡೆಯಾಗಲು ವಿಳಂಬವಾಗುತ್ತಿದೆ. ಆದರೆ ಈ ಬಗ್ಗೆ ನಟ ಧ್ರುವ ಸರ್ಜಾ ತಲೆಕೆಡಿಸಿಕೊಂಡಿಲ್ಲ. ಚಿತ್ರ ಕರಾರುವಕ್ಕಾಗಿ, ಸರಿಯಾಗಿ ಮೂಡಿಬರಲು ಅವರು ತಮ್ಮ ಪಾತ್ರಕ್ಕೆ ಸಿದ್ಧವಾಗಲು ತಯಾರಿ ನಡೆಸುತ್ತಿದ್ದಾರೆ.

ಚಿತ್ರ ಸರಿಯಾಗಿ ತೆರೆ ಮೇಲೆ ತರುವ ಉದ್ದೇಶದಿಂದ ನಿರ್ದೇಶಕ ನಂದಕಿಶೋರ್ ಮತ್ತು ನಿರ್ಮಾಪಕ ಗಂಗಾಧರ್ ಕೂಡ ತರಾತುರಿ ಮಾಡುವುದಿಲ್ಲವಂತೆ.

ಪೊಗರಿನಲ್ಲಿ ಶಾಲಾ ಬಾಲಕನ ಪಾತ್ರದಲ್ಲಿ ಕಾಣಿಸಿಕೊಳ್ಳುವುದಕ್ಕೆ ಧ್ರುವ ಸರ್ಜಾ ತಮ್ಮ ದೇಹದಲ್ಲಿ ರೂಪಾಂತರ ಮಾಡಿಸಿಕೊಳ್ಳಲು ತಯಾರಾಗಿದ್ದಾರೆ. ಅದಕ್ಕಾಗಿ ತಮ್ಮ ದೇಹವನ್ನು ಹುರಿಗೊಳಿಸುತ್ತಿದ್ದಾರೆ ಮತ್ತು ಡಯಟ್ ನಲ್ಲಿ ಕೂಡ ತೊಡಗಿದ್ದಾರೆ. ಇದೇ 7ರಿಂದ ಶೂಟಿಂಗ್ ಆರಂಭವಾಗಲಿದ್ದು ಅದಕ್ಕೂ ಮುನ್ನ ಧ್ರುವ ಸರ್ಜಾ ನೋಟವನ್ನು ಚಿತ್ರಕ್ಕೆ ಬೇಕಾದಂತೆ ತಯಾರಿಗೊಳಿಸಲಿದ್ದಾರೆ.

ಆರಂಭದಲ್ಲಿ ಹೈದರಾಬಾದ್ ನ ರಾಮೋಜಿ ಫಿಲ್ಮ್ ಸಿಟಿಯಲ್ಲಿ ಇಂದಿನಿಂದ ಶೂಟಿಂಗ್ ನಡೆಸಲು ಯೋಜಿಸಲಾಗಿತ್ತು. ಅದನ್ನೀಗ ಎರಡು ದಿನಗಳ ಕಾಲ ಮುಂದೂಡಲಾಗಿದೆ. ಏಕೆಂದರೆ ಧ್ರುವ ಸರ್ಜಾ ಮಲ್ಲಕಂಬದ ತರಬೇತಿಯಲ್ಲಿ ತೊಡಗಿದ್ದಾರೆ. ಈ ಕ್ರೀಡೆಯಲ್ಲಿ ಪರಿಣತಿ ಹೊಂದಿರುವ ಮಹಾರಾಷ್ಟ್ರದ ತಜ್ಞರು ಇಂದು ಬೆಂಗಳೂರಿನಲ್ಲಿ ಧ್ರುವ ಸರ್ಜಾಗೆ ತರಬೇತಿ ನೀಡಲಿದ್ದಾರೆ.

ಈ ಮಧ್ಯೆ, ಚಿತ್ರದಲ್ಲಿ ಧ್ರುವ ಸರ್ಜಾರ ಶಾಲಾ ಬಾಲಕನ ಪಾತ್ರ ತೆರೆಯ ಮೇಲೆ 15ರಿಂದ 20 ನಿಮಿಷಗಳ ಕಾಲ ಬರಲಿದೆ. ಇದರ ಶೂಟಿಂಗ್ ಇದೇ ಬುಧವಾರದಿಂದ ಆರಂಭವಾಗಲಿದೆ. ಇದರಲ್ಲಿ ಧ್ರುವ ಮತ್ತು ನಟ ರವಿಶಂಕರ್ ಅವರ ಪಾತ್ರವಿರುತ್ತದೆ.