ಬರಲಿದೆ ಗ್ಯಾಂಗ್ಸ್ ಆಫ್ ವಸೀಪುರ್-೩

ಕರಾಚಿ: ಅನುರಾಗ್ ಕಶ್ಯಪ್ ನಿರ್ದೇಶನದ 'ಗ್ಯಾಂಗ್ಸ್ ಆಫ್ ವಸೀಪುರ್' ಭಾಗ ೧ ಮತ್ತು ೨ರಲ್ಲಿ ಪ್ರೇಕ್ಷಕರನ್ನು ತಲ್ಲಣಗೊಳಿಸಿ ರಂಜಿಸಿದ ಮೇಲೆ ಈಗ ಮೂರನೆ ಅವತರಿಣಿಕೆ ಸಿದ್ಧವಾಗುತ್ತಿದೆಯಂತೆ. ಆದರೆ ಈ ಬಾರಿ ಅವರು ನಿರ್ದೇಶಕರಾಗಿರುವುದಿಲ್ಲವಂತೆ ಎನ್ನುತ್ತವೆ ಮೂಲಗಳು.

ಮೂಲಗಳ ಪ್ರಕಾರ ೪೨ ವರ್ಷದ ನಿರ್ದೇಶಕ, ಹಿಂದಿನ ಎರಡು ಸಿನೆಮಾಗಳಿಗೆ ಕಥೆ-ಸ್ಕ್ರಿಪ್ಟ್ ಬರೆದ ಜೇಶನ್ ಕ್ವಾದ್ರಿ ಅವರಿಗೆ ಸಿನೆಮಾ ನಿರ್ದೇಶಿಸಲು ಹೇಳಿದ್ದಾರೆ ಎಂದು ಪಾಕಿಸ್ತಾನದ ಡಾನ್ ಪತ್ರಿಕೆ ವರದಿ ಮಾಡಿದೆ.

ಸಂಗೀತ ಬಿಡುಗಡೆ ಕಾರ್ಯಕ್ರಮವೊಂದರಲ್ಲಿ ಈ ವಿಷಯ ತಿಳಿಸಿರುವ ಬರಹಗಾರ ಕ್ವಾದ್ರಿ "ವಸೀಪುರ್ ೩ ಕ್ಕೆ ಚಿತ್ರಕತೆ ಬರೆಯಲು ಅನುರಾಗ್ ನನ್ನ ಹಿಂದೆ ಬಿದ್ದಿದ್ದಾರೆ. ಅದನ್ನು ನಿರ್ದೇಶಿಸಲು ಕೂಡ ಹೇಳಿದ್ದಾರೆ. ಆದುದರಿಂದ ವಸೀಪುರ್ ೩ ಕ್ಕೆ ಚಿತ್ರಕಥೆ ಬರೆಯಲು ಪ್ರಾರಂಭಿಸಿದ್ದೇನೆ" ಎಂದು ಅವರು ತಿಳಿಸಿದ್ದಾರೆ.

ಕ್ವಾದ್ರಿ ವಸೀಪುರ್ ಎರಡನೆ ಭಾಗದಲ್ಲಿ ನಟಿಸಿದ್ದಾರೆ ಕೂಡ.