ಜೊತೆಗೂಡಲಿರುವ ರಾಜಮೌಳಿ ಮತ್ತು ಮಹೇಶ್ ಬಾಬು

ಚೆನ್ನೈ: ಭಾರತದ ಅತಿ ದೊಡ್ಡ ಬಜೆಟ್ ಸಿನೆಮಾಗಳಲ್ಲಿ ಒಂದಾದ 'ಬಾಹುಬಲಿ' ಚಿತ್ರದ ನಿರ್ದೇಶಕ ಎಸ್ ಎಸ್ ರಾಜಮೌಳಿ ಅವರು ತೆಲಗು ಸೂಪರ್ ಸ್ಟಾರ್ ಮಹೇಶ್ ಬಾಬು ಜೊತೆಗೂಡಿ ಸಿನೆಮಾವೊಂದನ್ನು ಮಾಡಲಿದ್ದಾರಂತೆ.

"ಕೆಲವು ವರ್ಷಗಳ ಹಿಂದೆಯೇ ಮಹೇಶ್ ಮತ್ತು ರಾಜಮೌಳಿ ಒಟ್ಟಿಗೆ ಸಿನೆಮಾ ಮಾಡಬೇಕಿತ್ತು ಆದರೆ ಅದು ತಡವಾಯಿತು. 'ಬಾಹುಬಲಿ' ಸಿನೆಮಾದ ಎರಡನೆ ಭಾಗ ಮುಂದಿನ ವರ್ಷ ಬಿಡುಗಡೆಯಾದ ನಂತರ ಇವರಿಬ್ಬರೂ  ಸಿನೆಮಾವೊಂದರಲ್ಲಿ ಕೆಲಸ ಮಾಡಲಿದ್ದಾರೆ" ಎಂದು ಮೂಲಗಳು ತಿಳಿಸಿವೆ.

೨೦೧೬ ರ ಕೊನೆಯ ಭಾಗದಲ್ಲಿ ಈ ಸಿನೆಮಾದ ಚಿತ್ರೀಕರಣ ಪ್ರಾರಂಭವಾಗಲಿದೆ ಎನ್ನುತ್ತವೆ ಮೂಲಗಳು.

"ಭಾಹುಬಲಿಯ ಎರಡನೇ ಭಾಗದ ಉಳಿದ ಚಿತ್ರೀಕರಣವನ್ನು ರಾಜಮೌಳಿ ಸೆಪ್ಟಂಬರ್ ನಲ್ಲಿ ಪ್ರಾರಂಭಿಸಲಿದ್ದಾರಂತೆ. ಇದು ಗುಗಿದ ನಂತರ ಮಹೇಶ್ ಬಾಬು ಅವರ ನಟನೆಯ ಚಿತ್ರವನ್ನು ಕೈಗೆತ್ತುಕೊಳ್ಳಲಿದ್ದಾರೆ" ಎಂದು ಮೂಲಗಳು ತಿಳಿಸಿವೆ.

ಈ ಸಿನೆಮಾದ ನಿರ್ಮಾಪಕ ಕೆ ಎಲ್ ನಾರಾಯಣ.

ಈ ಮಧ್ಯೆ ಮಹೇಶ್ ಅವರು ಶ್ರೀಕಾಂತ್ ಅಡ್ಡಲಾ ಅವರ 'ಬ್ರಹ್ಮಮಹೋತ್ಸವಂ' ಮತ್ತು ಪೂರಿ ಜಗನ್ನಾಥ್ ಅವರ ಹೆಸರಿಡದ ಚಲನಚಿತ್ರದ ಚಿತ್ರೀಕರಣದಲ್ಲಿ ನಿರತರಾಗಲಿದ್ದಾರೆ.