ಸಂಸತ್ ಆವರಣದಲ್ಲಿ 'ಎಮೆರ್ಜೆನ್ಸಿ' ಚಿತ್ರೀಕರಣಕ್ಕೆ ಅನುಮತಿ ಕೇಳಿದ ಕಂಗನಾ ರಣಾವತ್: ಸಿಗುತ್ತಾ? ಇಲ್ವಾ?

ನಟಿ ಕಂಗನಾ ರಣಾವತ್ ಸಂಸತ್ತಿನ ಆವರಣದಲ್ಲಿ ತಮ್ಮ 'ಎಮೆರ್ಜೆನ್ಸಿ' ಚಿತ್ರದ ಚಿತ್ರೀಕರಣಕ್ಕೆ ಲೋಕಸಭೆ ಸಚಿವಾಲಯದಿಂದ ಅನುಮತಿ ಕೋರಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ರಣಾವತ್ ಅವರ ಪತ್ರವು ಪರಿಗಣನೆಯಲ್ಲಿದೆ ಆದರೆ ಅವರು ಒಪ್ಪಿಗೆ ಪಡೆಯುವ ಸಾಧ್ಯತೆಯಿಲ್ಲ ಎಂದು ಮೂಲಗಳು ತಿಳಿಸಿವೆ.

ಲೋಕಸಭೆಯ ಸೆಕ್ರೆಟರಿಯೇಟ್‌ಗೆ ಪತ್ರ ಬರೆದಿರುವ ರಣಾವತ್ ಅವರು ಸಂಸತ್ತಿನ ಸಂಕೀರ್ಣದೊಳಗೆ ತುರ್ತು ಪರಿಸ್ಥಿತಿ ಆಧಾರಿತ ಚಲನಚಿತ್ರವನ್ನು ಚಿತ್ರೀಕರಿಸಲು ಅವಕಾಶ ನೀಡಬೇಕೆಂದು ಕೋರಿದ್ದಾರೆ ಎಂದು ನಟಿ ಹೇಳಿದರು. ಸಾಮಾನ್ಯವಾಗಿ, ಖಾಸಗಿ ಸಂಸ್ಥೆಗಳಿಗೆ ಸಂಸತ್ತಿನ ಸಂಕೀರ್ಣದೊಳಗೆ ಚಿತ್ರೀಕರಣ ಮಾಡಲು ಅಥವಾ ವೀಡಿಯೊಗಳನ್ನು ಮಾಡಲು ಅನುಮತಿ ನೀಡಲಾಗುವುದಿಲ್ಲ.

ಯಾವುದೋ ಅಧಿಕೃತ ಅಥವಾ ಸರ್ಕಾರಿ ಕೆಲಸಕ್ಕಾಗಿ ಶೂಟಿಂಗ್ ಮಾಡುತ್ತಿದ್ದರೆ ಅದು ಬೇರೆ ಮಾತು. ಮುಖ್ಯವಾಗಿ ಸರ್ಕಾರಿ ಪ್ರಸಾರಕರು, ದೂರದರ್ಶನ ಮತ್ತು ಸಂಸದ್ ಟಿವಿಗಳಿಗೆ ಸಂಸತ್ತಿನ ಒಳಗೆ ಕಾರ್ಯಕ್ರಮಗಳನ್ನು ಚಿತ್ರೀಕರಿಸಲು ಅವಕಾಶವಿದೆ. ಸಂಸತ್ತಿನ ಒಳಗೆ ಖಾಸಗಿ ಕೆಲಸದ ಚಿತ್ರೀಕರಣಕ್ಕೆ ಖಾಸಗಿ ಪಕ್ಷಕ್ಕೆ ಅನುಮತಿ ನೀಡಿದ ಯಾವುದೇ ನಿದರ್ಶನವಿಲ್ಲ ಎಂದು ಮೂಲಗಳು ತಿಳಿಸಿವೆ. 

ಇದನ್ನೂ ಓದಿ: 'ಎಮರ್ಜೆನ್ಸಿ' ಚಿತ್ರದ ಫಸ್ಟ್ ಲುಕ್ ಬಿಡುಗಡೆ: ಕಂಗನಾ, ಇಂದಿರಾ ಗಾಂಧಿ ತದ್ರೂಪಿಯೇ ಎಂದ ಅಭಿಮಾನಿಗಳು!

ಈ ವರ್ಷ ಜೂನ್‌ನಲ್ಲಿ 'ಎಮೆರ್ಜೆನ್ಸಿ'ಯ ಚಿತ್ರೀಕರಣ ಪ್ರಾರಂಭವಾಯಿತು. ರನೌತ್ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಇದಲ್ಲದೆ, ಅವರೇ ಚಿತ್ರದ ಬರಹಗಾರರು ಮತ್ತು ನಿರ್ಮಾಪಕರು. 1975ರಲ್ಲಿ ದೇಶದಲ್ಲಿ ತುರ್ತುಪರಿಸ್ಥಿತಿ ಹೇರಿದ ಮಾಜಿ ಪ್ರಧಾನಿ ಇಂದಿರಾಗಾಂಧಿ ಪಾತ್ರದಲ್ಲಿ ಅವರು ನಟಿಸುತ್ತಿದ್ದಾರೆ.

ಎಮೆರ್ಜೆನ್ಸಿ ಭಾರತೀಯ ರಾಜಕೀಯ ಇತಿಹಾಸದಲ್ಲಿ ಒಂದು ಪ್ರಮುಖ ಅವಧಿಯಾಗಿದೆ. ಇದು ನಾವು ಅಧಿಕಾರವನ್ನು ನೋಡುವ ವಿಧಾನವನ್ನು ಬದಲಾಯಿಸಿದೆ. ಆದ್ದರಿಂದ ನಾನು ಈ ಕಥೆಯನ್ನು ಹೇಳಲು ನಿರ್ಧರಿಸಿದೆ ಎಂದು ರನೌತ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. 1975ರ ಜೂನ್ 25ರಿಂದ 1977ರ ಮಾರ್ಚ್ 21ರವರೆಗೆ ದೇಶದಲ್ಲಿ ತುರ್ತು ಪರಿಸ್ಥಿತಿ ಜಾರಿಯಲ್ಲಿತ್ತು. ಈ 21 ತಿಂಗಳ ಅವಧಿಯಲ್ಲಿ ಜನರ ಮೂಲಭೂತ ಹಕ್ಕುಗಳ ಮೇಲೆ ನಿರ್ಬಂಧಗಳನ್ನು ಹೇರಲಾಯಿತು. ತುರ್ತುಪರಿಸ್ಥಿತಿಯ ನಂತರದ ಲೋಕಸಭೆ ಚುನಾವಣೆಯಲ್ಲಿ 1947ರಲ್ಲಿ ಭಾರತಕ್ಕೆ ಸ್ವಾತಂತ್ರ್ಯ ಬಂದ ನಂತರ ಮೊದಲ ಬಾರಿಗೆ ಕಾಂಗ್ರೆಸ್ ಸೋಲನುಭವಿಸಿತು.