ಅಮೆಜಾನ್ ಪ್ರೈಂ ಜತೆ ಪ್ರಿಯಾಂಕಾ ಚೋಪ್ರಾ 'ಮಲ್ಟಿ ಮಿಲಿಯನ್-ಡಾಲರ್' ಡೀಲ್

ಲಾಸ್ ಎಂಜಲೀಸ್: ಬಾಲಿವುಡ್ ನಟಿ ಪ್ರಿಯಾಂಕಾ ಚೋಪ್ರಾ ಜೋನಸ್ ಅವರು ಅಮೆಜಾನ್ ಪ್ರೈಂ ಜೊತೆ ಎರಡು ವರ್ಷದ ಮಲ್ಟಿ ಮಿಲಿಯನ್ ಡಾಲರ್ ಫಸ್ಟ್‌ ಲುಕ್ ಟಿವಿ ಡೀಲ್ ಮಾಡಿಕೊಂಡಿದ್ದಾರೆ.

37 ವರ್ಷದ ನಟಿ ಹಾಗೂ ನಿರ್ಮಾಪಕಿ ಇನ್‌ಸ್ಟಾಗ್ರಾಂನಲ್ಲಿ ಈ ವಿಷಯ ಹಂಚಿಕೊಂಡಿದ್ದು, ಅಂತಿಮವಾಗಿ ಈ ಸುದ್ದಿಯನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ನನಗೆ ಹೆಮ್ಮೆಯಾಗುತ್ತಿದೆ ಎಂದಿದ್ದಾರೆ.

ನಾನೊಬ್ಬ ನಟಿ ಹಾಗೂ ನಿರ್ಮಾಪಕಿಯಾಗಿ ಜಗತ್ತಿನಾದ್ಯಂತ ಭಾಷೆ, ಗಡಿ ದಾಟಿ ಪ್ರತಿಭೆಗಳಿಗೆ ಒಂದು ಮುಕ್ತ ವೇದಿಕೆಯಕನಸು ಕಂಡಿದ್ದೆ. ನನ್ನ ಪ್ರೊಡಕ್ಷನ್ ಹೌಸ್ ಪರ್ಪಲ್ ಪೆಬಲ್‌ ಕಂಪನಿಯ ಉದ್ದೇಶವೂ ಇದೇ ಆಗಿದೆ. ಈ ನಿಟ್ಟಿನಲ್ಲಿ ಅಮೆಜಾನ್‌ ಜೊತೆಗಿನ ಡೀಲ್‌ನೊಂದಿಗೆ ಹೊಸ ಹೆಜ್ಜೆ ಇಟ್ಟಿದ್ದೇನೆ ಎಂದು ತಿಳಿಸಿದ್ದಾರೆ.

ಹೊಸ ಆಲೋಚನೆಗಳಿಗೆ ನನ್ನನ್ನು ನಾನು ತೆರೆದುಕೊಳ್ಳುವುದರ ಜೊತೆಗೆ, ಬರೀ ಮನೋರಂಜನೆ ಮಾತ್ರ ನೀಡದೆ ಅದರ ಜೊತೆಗೇ ಜನರ ದೃಷ್ಟಿ ಹಾಗೂ ಯೋಚನಾ ಲಹರಿಯನ್ನು ನಾವು ತೆರೆಯಬೇಕು. ಕಳೆದ 20 ವರ್ಷದ ಸಿನಿ ಜರ್ನಿಯಲ್ಲಿ, 60 ಸಿನಿಮಾಗಳ ನಂತರ ನನ್ನ ಕನಸು ನನಸು ಮಾಡುತ್ತಿದ್ದೇನೆ ಎಂದೆನಿಸುತ್ತಿದೆ ಎಂದು ಪ್ರಿಯಾಂಕಾ ಬರೆದುಕೊಂಡಿದ್ದಾರೆ.