ರಜನಿಕಾಂತ್ '೨.೦'ಸಿನೆಮಾದ ವಿಜ್ಞಾನಿ ಪಾತ್ರದಲ್ಲಿ ಅಕ್ಷಯ್ ಕುಮಾರ್

ನವದೆಹಲಿ: ರಜನಿಕಾಂತ್ ನಟನೆಯ ಸೈನ್ಸ್ ಫಿಕ್ಷನ್- ಆಕ್ಷನ್ ಥ್ರಿಲ್ಲರ್ ಸಿನೆಮಾ '೨.೦' ಮೂಲಕ ಬಾಲಿವುಡ್ ನಟ ಅಕ್ಷಯ್ ಕುಮಾರ್ ತಮಿಳು ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಲಿದ್ದು, ವಿಜ್ಞಾನಿಯ ಪಾತ್ರ ಮಾಡಲಿದ್ದಾರಂತೆ.

"ತಮ್ಮ ಪರೀಕ್ಷೆಗಳು ವಿಫಲವಾಗಿ, ಹುಚ್ಚನಂತಾಗಿ ಕಾಣೆಯಾಗುವ ವಿಜ್ಞಾನಿಯ ಪಾತ್ರವನ್ನು ಅಕ್ಷಯ್ ಕುಮಾರ್ ಮಾಡಲಿದ್ದಾರೆ. ಇದಕ್ಕಾಗಿ ಅಕ್ಷಯ್ ತಮ್ಮ ನೋಟವನ್ನು ಸಂಪೂರ್ಣವಾಗಿ ಬದಲಿಸಿಕೊಂಡಿದ್ದಾರೆ" ಎಂದು ಮೂಲಗಳು ತಿಳಿಸಿವೆ.

ಬುಧವಾರ ಅಕ್ಷಯ್ ಅವರ ವಿಜ್ಞಾನಿ ಅವತಾರದ ಫೋಟೋಗಳು ಅಂತರ್ಜಾಲದಲ್ಲಿ ಸೋರಿಕೆಯಾಗಿವೆ. ದೆಹಲಿಯಲ್ಲಿ ಸದ್ಯಕ್ಕೆ ಚಿತ್ರೀಕರಣ ನಡೆಯುತ್ತಿದ್ದು "ಮುಂದಿನ ಎರಡು ವಾರಗಳಲ್ಲಿ ಚಿತ್ರೀಕರಣ ಸಂಪೂರ್ಣಗೊಳ್ಳಲಿದೆ. ಮುಂದಿನ ಹಂತದ ಚಿತ್ರೀಕರಣಕ್ಕೆ ಚಿತ್ರತಂಡ ಮೋರಾಕ್ಕೋಗೆ ತೆರಳಲಿದೆ" ಎಂದು ಮೂಲಗಳು ತಿಳಿಸಿವೆ.

"ರಜನಿಕಾಂತ್ ಮಾರ್ಚ್ ೩೦ ರಂದು ದೆಹಲಿ ಚಿತ್ರೀಕರಣಕ್ಕಾಗಿ ಚಿತ್ರತಂಡವನ್ನು ಸೇರಿಕೊಳ್ಳಲಿದ್ದಾರೆ" ಎಂದು ಕೂಡ ಮೂಲಗಳು ತಿಳಿಸಿವೆ.

ಶಂಕರ್ ನಿರ್ದೇಶನದ ಈ ಸಿನೆಮಾದಲ್ಲಿ ಆಮಿ ಜಾಕ್ಸನ್ ನಾಯಕನಟಿ.