ಶ್ರೀಲಂಕಾದಲ್ಲಿ ಜೆಸ್ಟ್, ಬೋಲ್ಟ್ ಅನಾವರಣ ಮಾಡಿದ ಟಾಟಾ ಮೋಟಾರ್ಸ್

ಕೊಲಂಬೊ: ಭಾರತೀಯ ವಾಹನ ಉತ್ಪಾದನಾ ಸಂಸ್ಥೆ ಟಾಟಾ ಮೋಟಾರ್ಸ್ ಮಂಗಳವಾರ ಶ್ರೀಲಂಕಾದಲ್ಲಿ ಎರಡು ನೂತನ ಕಾರುಗಳು- ಸೆಡಾನ್ ಜೆಸ್ಟ್ ಮತ್ತು ಬೋಲ್ಟ್ ಬಿಡುಗಡೆ ಮಾಡಿದೆ.

"ಆಯಾ ವಿಭಾಗದಲ್ಲಿ ಉನ್ನತ ಸೌಕರ್ಯಗಳನ್ನೊಳಗೊಂಡ ಈ ಎರಡೂ ಕಾರುಗಳನ್ನು ಜಾಗತಿಕ ಗುಣಮಟ್ಟದಲ್ಲಿ ವಿನ್ಯಾಸ-ಅಭಿವೃದ್ಧಿ ಮಾಡಲಾಗಿದ್ದು ಮೊದಲ ಬಾರಿ ಕಾರು ಕೊಳ್ಳುವವರಿಗೂ ಹಾಗೂ ಈಗಾಗಲೇ ಕಾರು ಉಳ್ಳವರಿಗೂ ಸಮನಾಗಿ ಆಕರ್ಷಿಸಲಿವೆ" ಎಂದು ಟಾಟಾ ಮೋಟಾರ್ಸ್ ನ ಪ್ರಯಾಣಿಕ ವಾಹನಗಳ ಅಂತರಾಷ್ಟ್ರೀಯ ವ್ಯವಹಾರಗಳ ಮುಖ್ಯಸ್ಥ ಜಾನಿ ಊಮ್ಮನ್ ತಿಳಿಸಿದ್ದಾರೆ.

"ಪ್ರಾದೇಶಿಕ ಮಾರುಕಟ್ಟೆಯಲ್ಲಿ ನಮ್ಮ ಸಂಸ್ಥೆಯ ಹೆಚ್ಚಿನ ಪ್ರಗತಿಗೆ ಬೋಲ್ಟ್ ಮತ್ತು ಜೆಸ್ಟ್ ಸಹಕಾರಿಯಗಲಿವೆ" ಎಂದು ಊಮ್ಮನ್ ತಿಳಿಸಿದ್ದಾರೆ.

ಸಂಸ್ಥೆಯೇ ತಿಳಿಸಿರುವಂತೆ ಈ ನೂತನ ವಿನ್ಯಾಸದ ಕಾರುಗಳನ್ನು ಭಾರತ, ಬ್ರಿಟನ್ ಮತ್ತು ಇಟಲಿಯಲ್ಲಿ ವಿನ್ಯಾಸ ಮಾಡಲಾಗಿದೆ.

ಆಗಸ್ಟ್ ೨೦೧೪ರಲ್ಲಿ ಜೆಸ್ಟ್ ಕಾರನ್ನು, ಜನವರಿಯಲ್ಲಿ ಬೋಲ್ಟ್ ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಲಾಗಿತ್ತು. ಈ ಎರಡೂ ಕಾರುಗಳ ಉತ್ಪನ್ನ ಪುಣೆಯಲ್ಲಿ ನಡೆಯುತ್ತದೆ.