ಮತ್ತೆ ಬಂತು ಡಟ್ಸನ್

ಈಗಾಗಲೇ ಸಾಕಷ್ಟು ಕಾರುಗಳಿಂದ ತುಂಬಿ ಹೋಗಿರುವ ಸಣ್ಣ ಕಾರುಗಳ ವಿಭಾಗಕ್ಕೆ ಮತ್ತೊಂದು ಸೇರ್ಪಡೆಯಾಗಿದೆ.
ನಿಸಾನ್ ಸಂಸ್ಥೆಯ ಅಂಗವಾದ ಮತ್ತು ಕಡಿಮೆ ದರದ ಕಾರುಗಳನ್ನು ಮಾರುಕಟ್ಟೆಗೆ ಬಿಡುವ ಸಂಸ್ಥೆಯಾದ ಡಟ್ಸನ್ ಸಂಸ್ಥೆ 'ಗೋ' ಹೆಸರಿನ ಸಣ್ಣ ಕಾರನ್ನು ಬಿಡುಗಡೆ ಮಾಡಿದೆ. ವಿಚಿತ್ರವೆಂದರೆ ಬಿಡುಗಡೆ ಮಾಡಿದ ತಕ್ಷಣ ಈ ಕಾರು ಭಾರತೀಯ ಮಾರುಕಟ್ಟೆಯಲ್ಲಿ ದೊರೆಯುತ್ತಿಲ್ಲ. ಬದಲಾಗಿ 2014ರಿಂದ ಈ ಕಾರು ಮಾರುಕಟ್ಟೆಯಲ್ಲಿ ಲಭ್ಯವಾಗಲಿದೆ. ಈ ಕಾರನ್ನು 4 ಲಕ್ಷ ಒಳಗಿನ ದರದಲ್ಲಿ ಮಾರಾಟ ಮಾಡಲು ಕಂಪನಿ ನಿರ್ಧರಿಸಿದೆ.
ಸುಮಾರು 32 ವರ್ಷಗಳ ಹಿಂದಿನವರೆಗೂ ಡಟ್ಸನ್ ಕಾರುಗಳು ಭಾರತದಲ್ಲಿ ಸಿಗುತ್ತಿದ್ದವಂತೆ. ಆ ಮೇಲೆ ಈ ಕಂಪನಿ ಭಾರತದಲ್ಲಿ ಕಾರುಗಳ ಉತ್ಪಾದನೆ ಮತ್ತು ಮಾರಾಟ ನಿಲ್ಲಿಸಿತ್ತು.
ಸಣ್ಣ ಕಾರುಗಳ ಒಳಾಂಗಣ ಶೈಲಿಯಲ್ಲಿ ಡಟ್ಸನ್ ಗೋ ಒಂದು ಭರ್ಜರಿ ಬದಲಾವಣೆ ಮಾಡಿದೆ. ಕಾರಿನ ಮುಂಭಾಗದ ಸೀಟಿನಲ್ಲಿ ಬಹುತೇಕ ಎಲ್ಲ ಕಾರುಗಳು ಕೇವಲ 2 ಸೀಟುಗಳನ್ನು ಮಾತ್ರ ನೀಡುತ್ತವೆ. ಹಳೆಯ ಅಂಬಾಸಿಡರ್ ಕಾರನ್ನು ಹೊರತು ಪಡಿಸಿದರೆ ಬೇರೆ ಯಾವುದೇ ಕಾರಿನಲ್ಲಿ ಮುಂಭಾಗದಲ್ಲಿ ಮೂರು ಜನ ಕೂರಲು ಸಾಧ್ಯವಿಲ್ಲ. ಆದರೆ ಡಟ್ಸನ್ ಗೋ ಕಾರಿನಲ್ಲಿ ಮುಂಭಾಗದಲ್ಲಿ ಮೂರು ಮಂದಿ ಕುಳಿತುಕೊಳ್ಳಲು ಅವಕಾಶವಾಗುವಂತೆ ಬೆಂಚ್ ಸೀಟು ಅಳವಡಿಸಲಾಗಿದೆ. ಅಲ್ಲದೇ ಗೇರ್ ಕೊಂಚ ಮುಂಭಾಗದಲ್ಲಿಡಲಾಗಿದೆ.
ಭಾರತದಲ್ಲಿ ಕಾರುಗಳ ಒಳಗೆ 5 ಜನ ಕುಳಿತುಕೊಳ್ಳಬಹುದಾದರೆ 6-7 ಜನ ಕುಳಿತುಕೊಳ್ಳುತ್ತಾರೆ. ಡಟ್ಸನ್ ಗೋನಲ್ಲಿ ಬಹುಶಃ ಆರಾಮವಾಗಿ 6 ಜನ ಕುಳಿತುಕೊಳ್ಳಬಹುದು.