ಆಸ್ಟ್ರೇಲಿಯಾದ ಫ್ರೀಜರ್ ನಲ್ಲಿ ೭೦ ಮೊಸಳೆಗಳ ತಲೆ ಪತ್ತೆ

ಸಿಡ್ನಿ: ಉತ್ತರ ಆಸ್ಟ್ರೇಲಿಯಾದ ಸಣ್ಣ ಪಟ್ಟಣವೊಂದರಲ್ಲಿ ೭೦ ಮೊಸಳೆಗಳ ತಲೆಗಳನ್ನು ಕಡಿದು ಹಾಕಿದ್ದು ಅವುಗಳನ್ನು ಫ್ರೀಜರ್ ನಲ್ಲಿ ಕೊಳೆಯಲು ಎಸೆಯಲಾಗಿದೆ ಎಂದು ಮಾಧ್ಯಮವೊಂದು ಮಂಗಳವಾರ ವರದಿ ಮಾಡಿದೆ.

ಆಸ್ಟ್ರೇಲಿಯಾದ ಉತ್ತರ ಪ್ರಾಂತ್ಯದ ಡಾರ್ವಿನ್ ನಗರದಿಂದ ೪೦ ಕಿಮೀ ದೂರದಲ್ಲಿರುವ ಹಮ್ಟಿ ಡೂ ಎಂಬ ಸಣ್ಣ ಪಟ್ಟಣದ ಪ್ರಾದೇಶಿಕ ಅಂಗಡಿಯ ಹತ್ತಿರ ಬಿಟ್ಟು ಹೋಗಿದ್ದ ಈ ಪ್ರೀಜರ್ ಅನ್ನು ಮಕ್ಕಳು ನೋಡಿದ್ದಾರೆ.

ಕನಿಷ್ಠ ೫೦ ರಿಂದ ೭೦ ಮೊಸಳೆಗಳ ತಲೆಗಳನ್ನು ಫ್ರೀಜರ್ ಒಳಗೆ ತುರುಕಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಅಭಯಾರಣ್ಯ ಮತ್ತು ಅರಣ್ಯ ಅಧಿಕಾರಿಗಳು ಜೊತೆಗೂಡಿ ತನಿಖೆ ನಡೆಸಿದ್ದಾರೆ.

ಆಸ್ಟ್ರೇಲಿಯಾದಲ್ಲಿ ಮೊಸಳೆಗಳನ್ನು ಸಂರಕ್ಷಿತ ಜೀವವಲಯದಲ್ಲಿ ಗುರುತಿಸಲಾಗಿದ್ದು ಭೇಟಿಯಾಡಿದವರಿಗೆ ೫೫,೭೭೯ ಡಾಲರ್ ದಂಡ ಅಥವಾ ಐದು ವರ್ಷದ ಜೈಲುಶಿಕ್ಷೆ ನೀಡಲಾಗುತ್ತದೆ.

ನಾಗರಿಕ ಸಮುದಾಯಕ್ಕೆ ಭೀತಿ ಎನಿಸುವಲ್ಲಿ ಮಾತ್ರ ಸೀಮಿತ ಸಂಖ್ಯೆಯ ಮೊಸಳೆಗಳನ್ನು ಭೇಟೆಯಾಡಲು ಪರವಾನಗಿ ನೀಡಲಾಗುತ್ತದೆ.

ಜಾಗತಿಕ ಫ್ಯಾಶನ್ ಮಾರುಕಟ್ಟೆಯಲ್ಲಿ ಮೊಸಳೆ ಚರ್ಮಕ್ಕೆ ಅಪಾರ ಬೇಡಿಕೆ ಇದೆ.